ಕೆಳಗಿಳಿಯುವಂತಿಲ್ಲ ಎಂದೂ.

ಅವನ ಕೈ ಹಿಡಿದು ಏರಿ ಹೋದೆ ಮೆಟ್ಟಲುಗಳ ಮೇಲೆ. - ತಿರುಗಿ ಮೇಲೆ ಮೇಲೆ.

ಏರುತ್ತಿದ್ದಂತೆ ಒಂದೊಂದೆ ಜರಿದು ಬಿದ್ದವು ಹಿಂದೆ, ಈ ಮೊದಲು ಏರಿದವೆಲ್ಲ ಅಲ್ಲೆ!

ಇನ್ನೀಗ ಹೋದರೆ ಮೇಲೆಯೇ ಹೋಗಬೇಕು, ಕೆಳಗಿಳಿಯುವಂತಿಲ್ಲ ಎಂದೂ!

ಅವ ಕರೆದನೋ ನಾ ಹೋದೆನೋ ಅರ್ಥವಾಗದೆ ಹಿಂದುಮುಂದೊಂದೂ!

ಅದೊ ಅಲ್ಲಿ ತಂಪ್ತಂಪು ತಂಬೆಳಕ ರಾಶಿ, ಮೇಲಿನ್ನು ಮೆಟ್ಟಲುಗಳಿಲ್ಲ,

ಎಲ್ಲೆಲ್ಲು ಬೆಳ್ ಬೆಳಕು ಬಿಳಿ ನೊರೆಯ ತೊರೆಯಂತೆ, ತೋರ್ದಾತ ಮರೆತ ಸೊಲ್ಲ.

ಇನ್ನೀಗ ಬೇರೇನು ಬಾಧಿಸದ ಹಗುರತೆಯು, ಹಾ, ಬೇಕೆನಿಸುತಿಲ್ಲ ಒಂದೂ.

ಇನ್ನೀಗ ಇದ್ದರೆ ಅಲ್ಲಿಯೇ ಇರಬೇಕು, ಕೆಳಗಿಳಿಯುವಂತಿಲ್ಲ ಎಂದೂ!